Díli, 16–18 Juñu 2025 — Alunu sira husi Kursu Estadu Maior Konjunta Integradu ba dala 4, kontinua hala’o ezame ba matéria Teknolojia Informasaun, ne’ebé hanorin husi Dr. Guilherme Soares iha Institutu Defeza Nasionál (IDN), durante loron tolu, ho énfaze espesiál ba peskiza akademika nian.
Objetivu husi ezame atu avalia no hadia alunu sira nia komprensaun kona-ba konténudu matéria, liuhosi prosesu aprendizajen ne’ebé uza metodolojia sientífika ho plataforma teknológiku modernu. Ba alunu sira, ne’ebé mai husi ofisial PNTL no F-FDTL, partisipasaun iha formasaun ne’e hodi aumenta sira nia kompeténsia profesional nian.
Durante sesaun hanorin, Dr. Guilherme fó énfaze ba importánsia uza ferramenta teknológiku sientífika hanesan Google Scholar, Scopus, Web of Science, Dimensions, Connected Papers, Elicit, no Mendeley. Plataforma sira ne’e importante tebes iha prosesu peskiza, tanba bele ajuda alunu sira hetan informasaun konfiável hanesan artigu sientífiku, jurnal no livru akademiku atu sustenta traballu ho evidénsia konkreta.
“Uza referénsia sientífika mak dalan ida atu hadia kualidade traballu individual. Iha era digital ida ne’e, informasaun iha Internet barak, maibé alunus sira tenki iha kapasidade atu filtra no uza deit dadus sientífiku,” hateten Dr. Guilherme Soares.
Alunu sira fó atensaun espesífiku ba Google Scholar tanba plataforma ida ne’e fasilita asesu ba artigu no publikasaun sientífiku foun, atu fó sustenta traballu akademiku ho base validu no relevante. Liuhosi prosesu ne’e, alunus sira aprende atu halo analize bibliométrika hodi sustenta peskiza, ho finálidade atu hadia sira nia kapasidade investigativa no kritika.
Programa aprendizajen ne’e fó kontribuisaun importante ba dezenvolvimentu edukasaun iha Timor-Leste, tanba hakat ida bele prepara alunu sira atu hadia kualidade diskusaun akademika no prontu atu enfrenta dezafiu profisionál. #MédiaIDN
|
|
