Fiskalizasaun ba obra Futuru Kampus Akademia Militar Konjunta iha Huldote Aileu

Iha âmbito ida ne’e, mós Sua Exelénsia Ministro de Defesa halao mos enkontru ho comunidade nebe hela besik no mos família uma kain rua nebe afetadu iha fatin refere hodi esplika klean liu tan intensaun governu nia hodi hari fatin refere no vatajem sa deit mak comunidade ka povu Aileu bele hetan liu husi dezenvolvimentu ida ne’e. Agradece mos ba comunidade iha fatin refere sira nia espiritu patriotiku no nasionalismu, ho vizaun ba futuru Municipio Aileu no Nasaun nian hodi voluntariamente oferece sira nia fatin ba projetu refere.

Ho konfiansa mos katak iha futuru oin mai sei sai husi fatin refere kuadrus de liderança, líderes nebe ho konsciencia nacionalista no patriotiku iha futuru nasaun nian. Aileu mak uluk bersu revolusaun nian no Aileu tenki sai bersu ba desenvolvimento iha futuru oin mai – teni comunidade local sira, hodi hatutan liafuan husi Sua Excelencia Ministru Klamar Fuik katak “Seguransa diak presiza lideransa diak, kuadru no ofisiais ne’ebé forma iha instituisaun ne’ebé iha programa no prosesu ensinu diak, apoiadu husi infraestrutura apropriadu.

Sua Exélensia Ministru Defeza, Kontra Almirante Pedro Klamar Fuik, hateten katak iha tempu besik IDN sei halo lansamentu pedra primeiru ba konstrusaun eskola iha âmbito selebrasaun ba tinan 15 existencia Instituto de Defesa Nacional nian.

Iha oportunidade ne’e Sua Exelénsia Ministru Defeza mós hato’o planu estratéjiku ba Forsa Armada, inklui Baze Brigada iha Aileu nebe sei okupa mos rai ne’ebé komunidade fó ba IDN ho hektaris 47, husi Suku Liu Rai, sei sai plataforma ba dezenvolvimentu.

Eskola Akademia Militar Konjunta, saliente mos sua Exélensia Ministru Defeza, sei transforma Aileu sai sidade akademika ba seguransa, sei ofrese rezidénsia ba alunu no kontribui ba ekonomia lokal, ne’ebé lori benefisia direita ba povu sira.

Diretór Ezekutivu Interinu IDN, Dr. Nuno Corvelo Sarmentu, hato’o obrigadu ba komunidade Suku Liu Rai, ho lideransa lokal, ne’ebé ho prontidaun no boa vontade fó rai ba IDN hodi hari eskola akademia militar konjunta Tanba. kolaborasaun ne’e , sei hadia relasaun entre estadu no komunidade iha ezersa funsaun defeza.

Alem de enkontru ida ne’e comunidade afetadu uma kain rua ne’e hetan mos kompesasaun hodi sira hari sira nia uma iha espasu nebe sira rasik decidi atu hari ba no iha tempu badak sei halo levantamentu ba bens nebe sei hetan afetasaun ba alargamentu estrada nebe sei asesu ba fatin refere.

Enkontru ne’e hetan partisipadu husi Diretóra Jerál Jestaun Rekursu IDN, Dra. Josefa dos Reis Gonsalves, Diretór Jerál Jestaun Rekursu Ministériu Defeza Sr. Martinho Moniz, Diretóra Servisu Akademia Eunice Austinia Noronha, Asesor Dr. Jose Manuel Fernandes, Reprezentantes Veternus Sr. Domingos dos Santos no Sr. Marcos dos Santos, Xefi Aldeia Bandeira Hun Joanico Mendonsa, Ofisiál Polísia Komunitáriu (OPS), no komunidade Hundolte, Suku Liu Rai. #MédiaIDN