Díli, 17 Juñu 2025 – Institutu Defeza Nasionál (IDN), liuhosi Diretór Direksaun Ensinu no Formasaun (CFR), Kapitaun Fragata Graduadu Nicolau Sousa Guterres, akompaña husi Kordenador Kursu Superintendente Xefi Polísia, António de Sá, halo enkontru kordenasaun ho reprezantante husi Guarda Nasional Republikana (GNR) Portugal, Koronel Carlos Alberto no Koronel Nuno Alberto.
Enkontru ida ne’e hala’o iha Auditóriu IDN iha Palasiu Governu, Dili, hodi ko’alia kona-ba formasaun ba alunus Kursu Estadu Maior Konjunta Integradu (CEMCI) ba dala haat, ne’ebé iha prosesu formasaun iha IDN.
Iha enkontru ne’e, GNR konfirma nia disponibilidades atu kontribui hanorin unidade kurikular sira ne’ebé relevante ba formasaun polísia. GNR sei fo kontribuisaun direta ba alunus 4 CEMCI iha área formasaun polísia nian, liuhosi unidade kurikular sira hanesan Operasaun PNTL, Protesaun Sivil, no Jestaun Krize.
Formasaun ba unidade kurikular ne’e sei fó ba alunus 4 CEMCI, no kontribui hodi hametin kapasidade sira iha aspétu seguransa no jestaun emerjénsia. Enkontru kordenasaun ne’e importante tebes atu asegura preparasaun antes prosesu hanorin komesa.
Além disso, alunus sira husi F-FDTL sei kontinua simu hanorin husi dosente sira husi Institutu Universitáriu Militar (IUM) Portugal, ne’ebé sei kontinua fó kontribuisaun ba prosesu formasaun no dezenvolvimentu kapasidade lideransa militar. #MédiaIDN
|
|
