Institutu Defeza Nasionál Timor-Leste (IDN-TL) marka prezensa hanesan membru observadór iha enkontru anuál Rede Track II Instituisaun Defeza no Seguransa ASEAN nian (NADI), ne’ebé hala’o iha loron 4 to’o 7 fulan-novembru tinan 2024, iha Singapura . Eventu ne’ebé organiza hosi Eskola Estudu Internasionál S. Rajaratnam, ko’alia kona-ba tópiku estratéjiku sira ho interese komún, hanesan konflitu rejionál no papél Reuniaun Ministru Defeza ASEAN nian (ADMM) no ADMM-Plus iha prevensaun no jestaun konflitu.
Durante eventu, reprezentante sira hosi nasaun oioin ASEAN nian fahe perspetiva sira kona-ba rivalidade estratéjiku ne’ebé aumenta entre poténsia boot sira, hanesan Estadus Unidus no Xina, ne’ebé fó impaktu diretamente ba estabilidade rejiaun Sudeste Aziátiku nian. Diskusaun sira subliña importánsia hosi resposta unifikadu ida, iha ne’ebé ASEAN buka solusaun kolaborativu sira ba konflitu sira, liuliu iha área sensível sira hanesan Tasi Súl Xina nian no ameasa sira ne’ebé mosu hosi alterasaun klimátiku sira, ne’ebé prova ona multiplika tensaun rejional sira.
Partisipasaun IDN-TL nian, nu’udar observadór, reforsa relevánsia Timor-Leste nian iha komprensaun no adaptasaun ba dezafiu seguransa no defeza rejionál sira ne’ebé afeta la’ós de’it nasaun membru ASEAN sira, maibé mós ekilíbriu jeopolítiku Indo-Pasífiku nian. Hodi adere hanesan observadór, IDN-TL hatudu ninia kompromisu atu kolabora ho esforsu internasionál sira, hetan no kontribui koñesimentu esensiál ba estabilidade no seguransa rejionál.
IDN-TL konsidera nia inkluzaun iha forum diskusaun ASEAN nian hanesan NADI hanesan estratéjiku, tanba eventu sira hanesan ne’e fó hanoin ne’ebé iha valór kona-ba oinsá atu hasoru konflitu sira no kestaun seguransa transnasionál sira. Liután, observasaun ba inisiativa sira ADMM no ADMM-Plus fó ba IDN-TL kompriensaun ida ne ebé klean liu kona-ba prátika di ak sira iha medida sira harii konfiansa nian no mekanizmu sira prevensaun konflitu nian, ne ebé esensiál ba polítika defeza Timor-Leste nian.
Prezensa Institutu Defeza Nasionál Timor-Leste nian iha NADI fó sinál ba proatividade hodi hametin parseria no halo diálogu ho nasaun sira seluk kona-ba solusaun ba dezafiu rejionál sira. Pozisaun ida-ne’e subliña mós importánsia Timor-Leste nian hodi kontribui ba estabilidade Sudeste Aziátiku nian, reforsa sentralidade ASEAN nian no promove pás no reziliénsia iha rejiaun ne’e. #MediaIDN
|
