Díli, 20 Agustu 2025 – Ministériu Defeza Timor-Leste iha kolaborasaun ho organizasaun G7+ organiza Konferénsia Internasionál hanesan parte importante husi selebrasaun loron-an FALINTIL ba dala 50. Konferénsia ne’e realiza iha Salaun Ministériu Negósius Estranjeirus no Koperasaun, iha Pantai Kelapa, Díli.
Konferénsia ne’e hala’o ho tema “Reforma Setór Defeza no Seguransa: Ensino Superior Militar, Lideransa no Defeza Rekursu Nasionál”, no hetan abertura ofisiál husi Sua Exelénsia Primeiru Ministru Kay Rala Xanana Gusmão, ba istória FALINTIL nian no importante nia papel iha establise Defeza Nasionál.
Ne’ebé hetan partisipa iha konferénsia mai husi Diretór Ezekutivu Interinu Institutu Defeza Nasionál, Dr. Nuno Corvelo Sarmento, ho Diretóra Jerál Jestaun Rekursu, Dra. Joséfa dos Reis Gonçalves ho kargu xefia no funsionáriu sira hotu iha IDN.
Konferénsia Internasionál ne’e fó oportunidade ba orador importante tolu atu partilha hanoin no estratéjia kona-ba futuru Defeza no Seguransa iha Timor-Leste:
1. Tenente Jenerál Domingos Raul “Falur Rate Laek”, Xefi Estado Maior Jenerál Forças Armadas, hato’o aprezentasaun kona-ba “Moderniza Formasaun Militar baseia ba Ensino Superior.”
2. Jenerál José da Fonseca, Xefi Estado Maior Jenerál F-FDTL, fó diskursu ho tematika “Reforça Lideransa Étika, Inkluzivu no Estratéjika iha F-FDTL.”
3. Dr. Hélder da Costa, Sekretáriu Jerál G7+, hato’o tema kona-ba “Integrasaun Defeza Rekursu Naturais ba Estratéjia F-FDTL.”
Iha Konferénsia ne’e mós hetan partisipasaun husi lideransa estadu nian hanesan: Prezidente Tribunal Rekursu, Dr. Afonso Carmona; Sua Exelénsia Ministru Defeza, Kontra-Almirante Donaciano Costa Gomes, membru IX Governu Konstitusionál, membru Parlamentu Nasionál, delegasaun husi nasaun amigu sira; korpu diplomátiku, alunu Kursu Estado Maior Konjunta Integradu (CEMCI) ba dala 4, no mós eis alunu sira.
Hafoin konferénsia remata, partisipante no delegasaun sira hala’o vizita ba Porto Díli, hodi kari ai-funan no fó omenajen ba Aswain FALINTIL sira ne’ebé fó-an ba mate hodi sosa libertasaun Nasaun RDTL ida ne’ebé agora ita hotu sente no asiste ba .
Komemorasaun Aniversáriu FALINTIL ba dala 50 mak remata iha Tasi Tolu, nudar simbolu rezisténsia no determinasaun povu Timor-Leste. #MediaIDN
|
|
