Díli-15 Maiu 2025, Kursu Estado Maior Konjuntu integradu ba dala 4 kontinua partisipa iha matéria unidade kurikular Ekonomia Baziku, ne’ebé hetan husi dosente Dr. Caetano C. Correia, Lic-Eco., M.Ak., CMA., C.FR., CIA. Aulas hala’o iha auditóriu IDN, Palásiu Governo, Díli.
Durante semana ida ne’e, lisaun foka ba Jestaun Orsamentu, espesiálmente kona-ba rôl no responsabilidade Falintil–Força Defesa Timor-Leste (F-FDTL) no Polísia Nasionál Timor-Leste (PNTL) iha prosesu jestaun finansamentu públiku. katak jestaun orsamentál ne’e, parte importante husi Ekonomia Baziku nian.
F-FDTL no PNTL tenke halo planeamentu orsamentál komprensivu atu determina prioridade no aloka rekursu tuir nesesidade operasionál no estratéjiku. Prosesu ida ne’e, envolve konsultasaun ho parte relevante no integra objetivu organizasaun ba tempu badak no naruk.
Jestaun orsamentu la’ós de’it kona-ba alokasaun fundu, maibé mós envolve alokasaun ba programa sira hanesan:
• Manutensaun ekipamentu,
• Formasaun ba pesuál,
• Operasaun rutina, no
• Investimentu iha infraestrutura.
F-FDTL no PNTL presiza konsidera fonte rendimentu, inklui orsamentu governu sentrál no fonte potensiál seluk atu sustenta atividade sira.
Sub-títulu ne’ebé alunos aprende durante leisaun iha loron dahaat mak:
• Ezekusaun Orsamentu,
• Supervizaun no Kontrolu,
• Halo Relatóriu Finanseiru no Responsabilidade,
• Hasa’e Kapasidade Jestaun,
• Jestaun Risku,
• Uzu Efisiente Rekursu,
• Monitorizasaun no Avaliasaun, no
• Planeamentu Prioridade iha ba tempu naruk.
Husi lisaun hirak ne’e, F-FDTL no PNTL bele identifika área sira ne’ebé presiza hadi’a no perfesiona atu hetan rezultadu ne’ebé di’ak iha futuru. Planeamentu orsamentál di’ak mak la’ós de’it lori alokasaun fundu, maibé mós estratéjia ne’ebé fó direksaun ba jestaun rekursu jerál hodi atinji objetivu organizasionál ho maneira efetivu no efisiente.
Tanba ne’e, matéria Ekonomia Baziku importante tebes ba institusaun Defeza no seguransa sira iha Timor-Leste. #MédiaIDN
|
|
