Díli, 6 Novembru 2025 – Institutu Defeza Nasionál (IDN) kinta feira lokraik , halo serimónia despedida ba dosente Tenente Koronel Luís Conceição, depois nia kontribuisaun durante fulan ida hanorin matéria Planeamentu Operasaun Kombate ba alunu Kursu Estadu Maior Konjunta Integradu dala 4, iha auditória IDN, Palásiu Governu, Díli.
Liu husi serimónia ne’e, Diretór Interinu IDN, Dr. Nuno Corvelo Sarmento, hato’o agradesimentu boot ba Tenente Koronel Luís Conceição nia disponibilidade no dedikasaun durante fulan ida hanorin alunu sira iha kursu CEMCI dala 4.
Dr. Nuno Corvelo Sarmento deklara katak, IDN sente honra no apresiasaun boot ba Tenente Koronel Luís Conceição nia kontribuisaun ne’ebé hatudu profisionalizmu, espírito kooperativu no kompeténsia pedagójika ne’ebé ajuda maka’as iha prosesu formasaun alunu sira.
Iha tempu hanesan, IDN mós simu Tenente Koronel Jorge Magalhães, ne’ebé sei integra ekipa dosente IDN atu kontinua apoiu ba formasaun alunu sira. Liu husi partilha nia esperiénsia, lideransa no koñesimentu militár , para kontribui reforsu akademiku no profisionál iha IDN.
“Ami sente honra atu simu Tenente Koronel Jorge Magalhães. Nia presensa sei aumenta prestíjiu no kualidade Kursu Estadu Maior Konjunta no mós Funsionariu iha IDN,” hatete Dr. Sarmento.
Reprezentante alunu CEMCI dala 4, Superintendente Ismail da Costa Babo, mós hato’o agradesimentu ba dosente Luís Conceição nia dedikasaun intelektual no kontribuisaun ba dezenvolvimentu rekursu umanu iha Timor-Leste.
“Matéria ne’ebé dosente aprezenta importante tebes atu prepara lideransa future iha área Seguransa no Defeza,” hatete Superintendente Ismail Babo.
Iha nia lian remata, Tenente Koronel Luís Conceição hato’o nia orgullo tamba hetan oportunidade atu partilha koñesimentu iha IDN.
“Kursu ida-ne’e fó oportunidade boot atu ajuda hasae kapasidade ofisiál Polísia no Militar hodi prepara sira ba papel lideransa iha institusaun Seguransa no Defeza,” hatete Tenente Koronel Luís Conceição.
Serimónia remata ho entrega prendes simboliku hanesan sinal amizade no apresiasaun, no remata ho foto hamutuk. #MédiaIDN
|
|
