Díli, 24 Abril 2025 – Reprezentante Diretór Interinu Institutu Defeza Nasionál (IDN), Dr. Nuno Corvelo Sarmentu, akompaña husi ekipa téknika, hala’o enkontru kordenasaun ho Diretór Sekretariadu Grande Projetu, Sr. Maurísio Borges, iha Ministériu Planementu Investimentu no Estratéjiku (MPIE). Enkontru ida ne’e, fó fokus ba diskusaun proposta orsamentu mega projetu Kampus IDN iha Aileu.
Enkontru kordenasaun ne’e ho base iha proposta IDN ne’ebé fó atensaun ba parte kompetente sira. Tan ne’e, IDN hetan bolu atu halo klarifikasaun jerál no ténika kona-ba proposta mega projetu ida ne’e, hodi parte Sekretariadu Grande Projetu bele halo ajendamentu ba reuniaun ho Konsellu Administrasaun husi Fundu Infraestrutura (KAFI) iha futuru.
Husi enkontru ida ne’e, IDN fó informasaun baze kona-ba projetu, atu parte relevante sira bele uza hodi defende proposta iha reuniaun KAFI. Tanba Mega projetu Kampus IDN iha Aileu, hanesan parte importante ida atu inklui iha Orsamentu Jerál Estadu (OJE) ba tinan 2026.
IDN foin enkamina proposta ne’e ba Grande Projetu, no MPIE sei konsidera ba ajustamentu iha planu orsamentu fundu infrastrutura. Iha tempu oin mai, sei hala’o tan reuniaun ho KAFI atu diskuti nesesidade alokasaun orsamentu ba tinan 2026 ba mega projetu ne’e . Prosesu sei kontinua ho aprezentasaun ba Komisaun Revisaun Orsamentu (KRO) iha tutela gabinete Primeiru-Ministru, no depois haka ba faze diskusaun iha Parlamentu Nasionál. Prosesu ida ne’e sei lori tempu.#MediaIDN
|
|
