Díli, 30 Jullu 2025 – Institutu Defeza Nasionál (IDN) hetan vizita ofisiál husi delegasaun Eskola Estudu Internasionál Rajaratnam (RSIS) husi Singapura. Vizita ne’e, hala’o iha auditoriu IDN, Palásiu Governu, Dili, no delegasaun RSIS hasoru malu ho Diretór Interinu IDN, Dr. Nuno Corvelo Sarmento, akompaña husi Diresaun Servisu Akademiku , Diresaun Ensino Formasaun, inklui diresaun Investigatviu dezenvolvimentu inovasaun (DIDI).
Objetivu prinsipal enkontru ida ne’e mak atu troka hanoin kona-ba área defeza no seguransa, liu-liu iha kontekstu mudansa klimátika. Vizita ne’e mós parte husi preparasaun atu realiza konferénsia kona-ba defeza no mudansa klimátika, ne’ebé sei akontese iha Timor-Leste, iha kooperasaun ho Nova Zelândia.
Eskola Estudu Internasionál Rajaratnam hanesan unidade graduadu autónoma husi Universidade Teknológia Nanyang (NTU) iha Singapura, ne’ebé orientadu ba peskiza no edukasaun iha área seguransa no relasaun internasionál. Instituisaun ne’e, hari’i iha tinan 1996 no ofrese programa edukativu iha nivel graduadu kona-ba asuntu internasionál no estudu estratéjiku, ho hanorin sira husi fakuldade internasionál.
Naran “Rajaratnam” fó onra ba Sr. S. Rajaratnam, ex-Primeiru Ministru Adjuntu no Ministru Negósius Estranjeirus Singapura, ne’ebé fó kontribuisaun bo’ot iha dezenvolvimentu politika externu Singapura. RSIS konsidera hanesan ida iha entre eskola graduadu sira di’ak liu iha Ázia iha área relasaun internasionál.
Delegasaun RSIS kompostu husi Ms. Junli Lim, peskizadora asosiadu, no Dr. Alistair D. B. Cook, koordinadór programa ajuda dezastre RSIS. hasoru malu ho Diretór Interinu IDN, Dr. Nuno Corvelo Sarmento, Diretór DIDI Dr. Guilherme Soares, Diretór Ensino Formasaun CFr. Nicolau Sousa Guterres, no Diretóra Akademika Dra. Eunice Noronha.
Enkontru remata ho entrega simbóliku prenda tradisionál tara bandu tais husi IDN ba delegasaun RSIS, no halo foto hamutuk hanesan recordasaun enkontru sira-nia. #MédiaIDN
|
|
