Aileu, 12 Agostu 2025 – Diretór Ezekutivu Interinu Institutu Defeza Nasionál (IDN), Dr. Nuno Corvelo Sarmento, akompaña husi Asesor, Dr. José Manuel Fernandes, hala’o enkontru kordenasaun ho Prezidente Autoridade Munisipál Aileu, Sua Exelénsia João Bosco Santos, iha loron tersa-feira. Enkontru ne’e hala’o iha ambitu preparasaun ba realizasaun atividade importante tolu iha loron 30 Agostu 2025.
Atividade importante tolu ne’e ne’ebé tuir orariu fiksu husi Institutu Defeza Nasional mak hanesan, 1 Komemorasaun Aniversáriu IDN ba dala 15. 2 Lansamentu kontrusaun Eskola Akademia Militar Konjunta. 3 Selebrasaun loron Konsulta Popular ba dala 26. Ne’ebé sei hala’o iha área Hundolte, Suku Liurai, Munisípiu Aileu.
Intensaun Diretór Interinu IDN ho nia komitiva mai hasoru Prezidente Autoridade Munisipál Aileu ho hanoin bele halo kordenasaun atu garante realizasaun efisiénte ba atividade importante sira. Ne’ebé IDN mos expressa nia interesse atu involve komunidade Suku Liurai no Autoridade Munisipál iha eventu importante mensiona.
Prezidente Autoridade Munisipál Aileu, Sr. João Bosco Santos, hato’o agradesimento ba visita no disponibilidade husi ekipa IDN atu kordena hamutuk. Nia Konfirma prontidaun Autoridade Munisipál atu apoia no marka presensa iha atividade importante sira, mesmo karik nia iha ajenda ba selebrasaun Konsulta Popular iha Postu Remexio.
Autoridade Munisipál sujere atu iha segunda semana oin, komisaun IDN ho ekipa Autoridade Munisipál hasoru malu fali hodi halo kordenasaun teknika, inklui oráriu no preparativu sira ba realizasaun atividade ne’ebé previstu.
Hanesan Autoridade Munisipál halo komentáriu positivu kona-ba lansamentu Eskola Akademia Militar Konjunta iha loron 30 Agostu, ne’ebé sei kontribui ba dezenvolvimentu Aileu no rai benefísiu ba komunidade. #MédiaIDN
|
|
