Díli, 8 Jullu 2025 – Diresaun Ensinu no Formasaun Institutu Defeza Nasionál (IDN) lansa ona tema traballu individual ba alunus Kursu Estadu Maior Konjunta Integradu (CEMCI) dala-4 iha semana kotuk. Inisiativa ida ne’e halo atu fó oportunidade ba alunu sira prepara aprezenta tema tolu ba Diresaun Ensinu Formasaun hetan aprovasaun.
Tuir oráriu husi IDN, tempu ikus ba entrega tema traballu individual mak to’o loron 17 fulan jullu. Nune’e aproveita husi aulas ne’e, Diresaun Ensinu Formasaun kontinua ko’alia ho alunus sira atu husu progresu, identifika dezafiu saida sira mak hasoru no buka solusaun hamutuk.
Diretor Diresaun Ensinu no Formasaun, Kapitaun Fragata Graduadu Nicolau Sousa Guterres hatete katak, tuir normas edukasaun, alunus sira tenke aprezenta tema tolu. Tema ida obrigatóriu no rua seluk livre-eskolha.
Tema obrigatóriu ba alunu husi F-FDTL tenke bazeia ba relatoriu avaliasaun kapasidade F-FDTL iha tinan 2022, ne’ebé altura ne’ebá, ekipa sira hala’o intervista ho lider resisténsia no ex-titular sira para identifika problema relevante iha F-FDTL.
Iha fase submisaun ne’e, IDN fó tempu to’o loron 17 atu alunu sira hatama tema sira atu hetan aprovasaun, antes hakerek proposta detallu. Se tema sira aprezenta la konsidera apropriadu, Diresaun bele fó tema foun atu alunu sira halo.
Ba alunu sira husi PNTL, konsidera katak relatoriu kapasidade iha estrutura PNTL mos iha, entaun alunu bele foti tema ne’ebé relasiona ho desafiu sira iha PNTL nia laran, identifika problema, halo proposta no hetan aprovasaun para halo traballu sobre limitasaun institusionál PNTL hasoru durante ne’e.#MédiaIDN
|
|
