Díli- Ministériu Transporte no Komunikasaun (MTK) organiza konferénsia Internasionál durante loron rua, (hahu loron 20 to’o loron 21 Marsu tinan 2025 ) ho tema Aproveita Transformasaun Dijitál hodi Hametin Servisu Públiku sira hodi Avansa Transparénsia, Efisiénsia, no Efikásia”, ne’ebé konvida oradór husi Nasaun lima, mai fahe sira-nia esperiénsia kona-ba transformasaun Dijitál.
Nune’e iha Konferénsia Internasional ba loron 21 marsu tinan ne’e, hetan partisipa mós husi Diretór Interinu Instituto Defeza Nasionál (IDN) Dr. Guilherme Soares ,iha sentru Konvesaun Díli, tanba konsidera eventu ne’e, nu’udar oportunidade pertinente tebes, atu hetan vizaun jerál kona-ba Timor-Leste nia viajen ba transformasaun Dijitál.
Nune’e bele rona mós, esperiénsia husi matenek na’in sira iha asuntu dijitalizasaun no seguransa sibernétika, husi Kamboja, Austrália, Vietname, Singapura no Indonézia, iha ho intensaun bele sai referensia atu Timor Leste bele adapta bazeia ba Timor Leste nia realidade.
Iha oportunidade Semináriu internasionál ne’e, orador sira partilha mós sira nia esperensia, sobre harii fundasaun forte ba infraestrutura dijitál no konetividade, seguransa sibernétika, dijitalizasaun ekonomia dijitál, serbisu hamutuk ho Ministériu Transporte komunikasaun (MTK ) ho nia ajénsia sira ne’ebé fó apoiu ba implementasaun inisiativa dijitál.
Konferénsia ida-ne’e importante, tanba sei forma futuru paizajen dijitál Timor-Leste ni’an, tanba Governu Timor-Leste, hakarak transformasaun ho determinasaun ba vizaun. Hamutuk, aproveita kbiit teknolojia ni’an hodi harii setór públiku ida ne’ebé transparente, efisiente, hodi servi sosiedade ho integridade ba inovasaun.
Espera liu husi konferénsia durante loron rua, ema hotu bele aproveita teknolojia ho diák nu’udar instrumentu ne’ebé maka’as, atu moderniza governasaun, hadi’a prestasaun servisu públiku no dudu kreximentu ekonómiku.
Enkunatu hanesan trasa ona iha Planu Estratéjiku Nasionál 2011-2030, liu husi planu dezenvolvimentu Nasionál nia , objetivu maka atu harii infraestrutura telekomunikasaun modernu ne’ebé fasilita kreximentu inkluzivu no dezenvolvimentu sustentavel. #MédiaIDN
|
|
