Díli – Diretór Interinu Ezekutivu husi Institutu Defeza Nasionál (IDN), Dr. Nuno Corvelo Sarmentu, akompaña husi Diretór ensinu formasaun Kapitaun Fragata Graduadu Nicolao Sousa Guterres ho Kordenador Kursu Superitendente Xefi Antonio de Sa, kuarta-feira lokraik (20 Agostu 2025) partisipa iha serimónia komemorasaun aniversáriu ba Forsas Armadas Libertasaun Nasionál Timor-Leste (FALINTIL) ba dala 50, ne’ebé realiza iha área sagradu Tasi-Tolu, Díli.
Serimónia istóriku no importante ne’e prezide diretamente husi Sua Exelénsia Prezidente Repúblika Timor-Leste, Dr. José Ramos-Horta, ne’ebé mós hanesan Komandante Supremu ba Forsas Armadas Timor-Leste.
Iha diskursu prezidensiál, prezidente fó enfaze katak loron aniversáriu FALINTIL importante tebes atu hakonu povu nian hanoin kona ba istória resisténsia, fó valor ba sakrifísiu no luta sira ne’ebé hala’o ho determinasuan boot atu hetan liberdade nasionál. Loron-ne’e simboliza mós unifikasaun, patriotizmu no kontinuidade espírutu FALINTIL iha dezenvolvimentu Forsas Armadas no defende soberania no integridade nasionál.
Institutu Defeza Nasionál, iha nia parte, nafatin kontinua fó kontribuisaun atu hatutan ,kultura patriótiku no dezenvolve lideransa iha área seguransa no defeza. #MediaIDN
|
|
