Díli, 12 Maiu 2025 – Institutu Defeza Nasionál (IDN) hala’o enkontru kordenasaun ho ICRC atu diskute no koordena atividade palestra kona-ba asuntu apoio umanitáriu ba alunus Kursu Estadu Maior Konjunto Integradu (CEMCI) ba dala haat, ne’ebé momentu ne’e hetan formasaun iha IDN.
Komité Internasionál Cruz Vermelha, nu’udar organizasaun imparsiál, neutru no independente, iha misaun eskluzivu umanitáriu atu proteje vida no dignidade vítima konflitu armadu no situasaun violénsia. Iha enkontru ida ne’e, diskute mós mekanismu apoio umanitáriu husi autoridade defeza no seguransa atu sustenta atividade ICRC.
Apoiu humanitáriu husi parte defeza no seguransa iha situasaun emergénsia, hanesan desastre natural ka konflitu, importante tebes. Apoiu ne’e bele iha forma hanesan.
• Transporta ajuda (ai-han, bee, medikamentu),
• Harii ponti ka dalan atu fasilita asesu ba ema,
• Halo seguransa ba organizasaun humanitáriu atu bele hala’o sira nia servisu.
Maibé, atu realiza apoio ne’e, parte defeza no seguransa tenke respeita prinsipiu humanitáriu sira, neutralidade, imparsiálidade, no independénsia. Importante mós atu halo klaru katak parte defeza no seguransa la tuir interese polítiku no sei respeita ema tomak iha área ne’ebé presiza ajuda.
Kooperasaun no koordinasaun entre forsa defeza no seguransa ho organizasaun humanitáriu importante tebes, atu garante ajuda sei la’o ba ema ne’ebé presiza, ho maneira ne’ebé respeita prinsipiu humanitáriu sira.
Durante enkontru ne’e, parte ICRC hatudu sira nia prontidaun no preparasaun atu hato’o palestra iha IDN, no halo koordenasaun ho tempu ne’ebé IDN propoin. Planu mak atu hala’o palestra iha fulan oin, no koordenasaun sei kontinua ho Cruz Vermelha Timor-Leste. Iha tempu apropriadu, bele involve peritu ruma atu hato’o palestra relevante iha IDN. #MédiaIDN
|
|
