Instituto de Defesa Nacional (IDN) se halao konferénsia iha loron 18 de Fevereiru de 2025, ho téma:
“Kapasitasaun no Dezafiu ba Forças de Defesa no Seguransa iha Timor-Leste: Análize Krítika no Perspetiva ba Operasaun iha Senáriu Komplexu”.
Atividade ne’e se halao iha Auditóriu IDN, Palásiu Governu, Díli, no se sai palestrante ba palestra mai husi alunu sira husi Kursu Estado-Maior Konjuntu no Integradu (CEMCI 2024/2025), nune’e mós konvidadu espesiál ne’ebé especialista iha seguransa no defesa nasaun.
Palestrante sira no Téma ne’ebé Diskute
Konferénsia ne’e fó oportunidade ba palestrante sira atu hato’o hanoin importante kona-ba seguransa no defesa:
Oradór sira nia biografia:
Koronel (Ref) Antonio Jose Sampaio e Silva
Nia iha esperiénsia militár ne’ebé kle’an, nu’udar koronél reformadu iha Ezérsitu Portugés, tuir kursu Infantaria iha Akademia Militár, no nu’udar profesór iha eskola superiór Forsa Seguransa Makau nian. Oras ne’e daudaun nu’udar asesór ba F-FDTL no nu’udar profesór iha Institutu Defeza Nasionál.
CFR. Julian Pinto da Silva
Nia hetan lisensiatura no mestradu iha área Direitu husi Universidade Dili no kompleta Kursu CPOS iha tinan 2017. Oras ne’e daudaun nu’udar Adjuntu Diretór Autoridade Marítima Nasionál.
Tcor Graduadu “Cmd” Gregorio Bernardo Correia, Nia iha lisensiatura Direitu husi Universidade da Paz iha Dili, kompleta kursu pós-graduasaun iha Estudu Estratéjiku iha Institutu Defeza Nasionál, kompleta Kursu CPOS iha tinan 2019, no nu’udar estudante Mestradu iha Seguransa no Dezenvolvimentu Nasionál Sustentável. Agora daudaun nia maka Komandante IIº Batallaun IIº Setór Súl nian.
Sup. Assistente. Silverio de Araujo
Nia iha lisensiatura iha Polítika Públika husi Universidade Nasionál Timor-Leste no remata Kursu CPOS iha tinan 2015. Agora daudaun nu’udar Komandante Interinu da-2 iha Unidade Espesiál Polísia nian.
Importánsia Konferénsia Nian
Atividade ne’e sai plataforma importante atu diskute no analiza dezafiu no oportunidá ne’ebé Forças de Defesa no Seguransa Timor-Leste iha operasaun kompleksu.
IDN kontinua reforsa nia kompromisu forte ba formasaun nian, atu haburas kapasitasaun estratégia no lideransa ba futuru seguransa nasaun nian.#MediaIDN
|
|
