Díli, 26 Juñu 2025 – Alunu husi Kursu Estadu Maior Konjunta Integradu (CEMCI) ba dala 4, hamutuk ho ofisiál husi PNTL hosi postu Superintendente Asistente to’o Superintendente Xefi, no ofisiál F-FDTL hosi postu Majór to’o Koronel ne’ebé sei tama idade reforma, partisipa iha palestra loron rua, ne’ebé hala’o iha Auditóriu Instituto Defeza Nasionál (IDN), Palásiu Governu, Díli.
Palestra ne’e organiza husi IDN kooperasaun ho Banku ANZ, ho tema prinsipal “Baze Negósiu”, aprezenta husi oradora Jeni Balong,parte importante iha matéria ekonomia no finansa ne’ebé alunu 4 CEMCI sira aprende iha fulan Maiu.
Objetivu prinsipal husi palestra ne’e mak atu reforsa koñesimentu alunu no ofisiál sira kona-ba jestaun finanseira, hodi prepara sira atu jere osan ho responsabilidade no bele harii negósiu ki’ik hafoin reforma.
Formador sira husi Banku ANZ fó orientasaun pratiku kona-ba oinsá jere osan no halo planu finanseiru ne’ebé sustenta, ho importante tebes ba sira ne’ebé sei tama fase reforma.
Diretór Ezekutivu Interinu IDN, Dr. Nuno Manuel Corvelo Sarmento, iha nia diskursu abertura, hatete kontente IDN fó oportunidade ba alunu no ofisiál PNTL no F-FDTL sira atu hetan palestra importante hanesan parte formasaun. Nia mós hato’o obrigadu boot ba Banku ANZ nia kontribuisaun liuhusi formador sira ne’ebé partilha koñesimentu pertinente ida ne’e.
Fasilitador programa “Financial Literacy” husi ANZ, Celio Jacinto Lopes do Ceu, hamutuk ho formadora Jeni Balong, esplika katak programa Money Minded dezenvolve husi ANZ desde tinan 2003 ho objetivu atu ajuda individuu sira hasai abilidade jestaun osan. Programa ne’e inklui mós Business Basics, ne’ebé fó edukasaun kona-ba oinsá harii, jere no dezenvolve negósiu ki’ik.
Programa Money Minded mak agora implementa iha nasaun 24 iha rejiaun Ázia-Pasífiku, liuhusi semináriu sira ne’ebé hala’o ho forma gratuita ho organizasaun parceiru sira. Iha Timor-Leste, ANZ komesa implementa programa ne’e iha tinan 2015, no to’o agora, kuaze ema 3.000 hetan benefísiu.
IDN hato’o agradese boot ba Banku ANZ nia kolaborasaun kontínua, ne’ebé kontribui ba dezenvolvimentu koñesimentu finanseiru ba ofisiál sira husi PNTL no F-FDTL, ne’ebé atu hakat ba faze prosesu reforma.
Iha serimónia enseramentu, Diretór Ezekutivu Interinu Dr. Nuno Manuel Corvelo Sarmento hatudu esperansa ba konñesimentu ne’ebé alunu no partisipantes sira simu durante loron rua. Tanba durante formasaun ne’e, orador sira husi Banku ANZ partilha palestra kona-ba oinsá jere osan rasik no oinsá bele hahú halo negosiu. Informasaun hirak ne’e,bele sai referénsia benefisia ba sira-ne’ebé iha planu atu hahú negosiu iha futuru, no mós hirak ne’eb’e hahu buka dalan ba halao negosiu.
Dr. Nuno Sarmento mós hato’o agradecimentos boot ba ekipa formador sira husi Banku ANZ, ne’ebé hatudu disponibilade atu partilha esperiénsia ho alunus husi CEMCI, inklui ofisiais husi PNTL no F-FDTL sira ne’ebé hein ba faze reformada. Informasaun ne’ebé partilha importante tebes, atu ajuda sira iha preparasaun hodi jere osan rasik no tama iha atividadi negosiu ne’ebé iha baze konkreta.
Atividade akademika ba loron rua ne’e remata ho susesu no akompaña direitamente husi Diretór Ezekutivu IDN, Dr. Nuno Manuel Corvelo Sarmento, Diretór Ensinu no Formasaun, Kapitaun Nicolau Sousa Guterres, no Kordenador Kursu, Superintendente Xefi António de Sá.
Partisipantes sira mai husi alunu CEMCI dala-4, ofisiál husi PNTL no F-FDTL ne’ebé sei tama idade reforma, no mós kargu xefia no funsionáriu IDN sira.
Atividade ne’e remata ho IDN entrega prendas ba Formador nain rua, no rekorda momentu importante sira nune’e ho foto hamutuk #MédiaIDN.
|
|
