Díli, 6 Maiu 2025 – Estudante sira husi kursu Estadu Maior Konjunto Integradu (CEMCI) ba dala haat, kontinua tuir matéria etika no moral ho enfaze ba prátika moral iha Igreja Katóliku, ne’ebé hanorin husi Amu Kapelaun FALINTIL-Força Defeza Timor-Leste (F-FDTL), Rui Gomes, iha auditóriu IDN Palásiu Governu, iha Díli.
Tuir oráriu husi Diresaun Ensinu no Formasaun IDN, aulas referida sei hala’o durante loron tolu, hahu husi loron 6 to’o loron 9 fulan Maiu tinan 2025.
Matéria ne’e ho lema “Igreja Nia Pedidu ba Kuidadu Espirituál iha Força Defeza no forsa seguransa ”, sublinha importante papel moral no espiritual ba membru milítar sira. Igreja Katóliku fó hanoin katak funsaun milítar no polísial tenke konsidera an ho responsabilidade nu’udar ministru ba seguransa no liberdade povu nian. Bainhira halo ho di’ak, sira bele kontribui ba estabelesimentu dame iha sosiedade.
Grupo milítar sira ho sira-nia família, konsidera parte importante husi Maromak nia Povu, ne’ebé iha presizaun atu simu asisténsia pastorál ne’ebé konkrétu. Sistema ne’e halo sustenta ho existénsia Ordinariadu Militár, ne’ebé hala’o servisu relijiozu husi orientasaun Sé Apostólika.
Kapelaun sira fó kontribuisaun hanesan mestri relijiozu no peritu ba ensinu moral, atu bele harii dame iha mundu. Misaun ne’e, importante tebes iha akompañamentu espiritual ba membru F-FDTL ho PNTL sira no sira-nia família, hodi prevene violasaun lei umanitária, hamenus moras no terus, hanesan refere Papa Fransisku iha tinan 2005.
Doutrina Sosiál Igreja Katóliku ni’an fó base ba dame, seguransa no hakmatek hanesan parte fundaméntal ba moris-di’ak. Igreja sublinha katak deféza lejítima justifika ezisténsia Força Armada iha Estadu, nune’e uza forsa tenke serve objetivu ba dame, proteje sidadaun, no tulun vítima inosente sira iha tempu konflitu.
Iha tempu funu, la’ós buat hotu sai legal. Kombatente, soldadu kanek no dadur sira tenke hetan respeitu no trata ho dignidade umana. #MédiaIDN
|
|
