Dili, 2 FEV – Forsa Defeza Timor-Leste (F-FDTL)selebra aniversáriu ba dala 24 transformasaun husi FALINTIL ba F-FDTL, serimónia solene ne’ebé hala’o iha Kuartél Jenerál F-FDTL. Eventu ne’e hetan partisipasaun husi autoridade nasionál altu sira, inklui Prezidente Repúblika hanesan mos Komandante Supremu Forsas Armadas nian, Dr. Jose Ramos-Horta.
Serimónia ne’e marka ho programa ofisiál ne’ebé inklui formatura militár, chegada S.E. Prezidente Repúblika, Onra militár, entrega Estandarte Nasionál ba forsa parada nian, Hodi fó onra ba mártir sira patria nian, hala’o minutu ida silénsiu nian. Aleinde ne’e, iha promosaun sira ba pesoál militár sira, hodi reafirma kompromisu ba avansu karreira nian iha Forsa Armada nia laran.
Iha eventu ne’e, Xefe Estadu Maior Jenerál Forsa Armada, Tenente Jenerál Falur Rate Laek, destaka iha nia diskursu kona-ba evolusaun no dezafiu sira F-FDTL nian, subliña papél fundamentál instituisaun nian iha soberania no seguransa nasionál. Prezidente Repúblika, Dr. José Ramos-Horta mós ko’alia, subliña importánsia Forsa Armada nian hodi harii pás no estabilidade iha rai-laran.
Eventu ne’e hetan partisipasaun husi autoridade oioin, inklui Prezidente Tribunál Rekursu, Dr. Deolindo dos Santos, Ministru Defeza, Kontra-Almirante Donaciano Costa Gomes, membru Parlamentu Nasionál, Membro do Governu, no mós eis CEMGFA F-FDTL no eis Ministru Defeza sira. Marka prezensa mós Komisáriu Jerál Polísia Nasionál Timor-Leste (PNTL), CEMGFA Portugal, Representa CEMGFA Australia, membro corpo diplomatico sira, adido da defesa sira, assessore militares sira, ofisiál jenerais sira, diretór nasionál sira, ofisiál superiór sira, subalternu sira, sarjentu sira, prasa no soldadu sira.
Diretór Interinu Institutu Defeza Nasionál (IDN), Guilherme Soares, mós marka prezensa iha serimónia ne’e, hodi reforsa kompromisu IDN nian hodi hametin kapasidade estratéjiku no intelektuál forsa defeza no seguransa Timor-Leste nian.
Serimónia ne’e konklui ho desfile militár, hatudu disiplina no profisionalizmu Forsa Armada timoroan nian. Nu’udar parte husi selebrasaun sira, hala’o lansamentu ofisiál ba website F-FDTL nian, hodi reforsa kompromisu instituisaun nian ba modernizasaun no transparénsia. Eventu ne’e kulmina ho almosu volante, hodi promove rede entre partisipante sira.
Aniversáriu transformasaun FALINTIL ba F-FDTL reafirma knaar esensiál Forsa Armada nian iha defeza soberania no dezenvolvimentu nasaun nian, hodi fó onra ba legadu kombatente libertasaun nasionál sira nian.#MediaIDN
|
|
