Aileu, 21 Agustu 2025 – Institutu Defeza Nasionál (IDN) hamutuk ho Autoridade Munisípal Aileu realiza enkontru kordenasaun iha salaun Administrasaun Munisípal Aileu, iha loron kinta-feira, atu prepara no organiza atividade importante tolu ne’ebé sei realiza iha loron 30 Agustu 2025 iha área Hundolte, Suku Liurai, Munisípiu Aileu.
Atividade importante tolu ne’e mak hanesan:
1. Lansamentu Kontrusaun Eskola Akademia Militar Konjunta;
2. Komerasaun Aniversáriu Institutu Defeza Nasionál ba dala-15; no
3. Selebrasaun Loron Konsulta Populár ba dala-26.
Atividade sira ne’e sei akompaña tuir planu ofisiál IDN, no iha sinifikadu importante ba istória no dezenvolvimentu sistema seguransa nasionál iha Timor-Leste.
Enkontru koordinasaun ne’e hetan partisipasaun direta husi Diretór Ezekutivu Interinu IDN, Dr. Nuno Corvelo Sarmento, ho Asesor Dr. José Manuel Fernandes, no Diretóra Servisu Akademia, Dra. Eunice Austinia Noronha, hamutuk ho ekipa Prezidente Komisaun organizadora husi IDN. Iha nivel Munisípal , partisipante husi Sua Exelénsia Prezidente Autoridade Munisípal Aileu João Bosco Santos, ho membru sira husi Linha Diresaun Munisípal.
Rezultadu prinsipál husi enkontru mak formasaun ekipa operasional atu responsavel ba kordenasaun no implementasaun atividade sira. IDN forma Komisaun no Autoridade Munisípal indika linha Diresaun Munisipal 12 , hetan kordenador husi Diretór Agrikultura Munisípal, koordena servisu ho komisaun sira husi IDN.
Ho Objetivu mak atu garante preparasaun serimónia importante tolu ne’e bele lao ho susesu, seguransa no dignidade, hanesan parte importante ba prosesu soberania no memórial nasional.
Hafoin enkontru, Delegasaun IDN no PAM Aileu, inklui Xefi servisu sira husi linha diresaun munisípal, hala’o vizita terenu ba área Hundolte hodi observa kondisaun fatin ne’ebé sei realiza atividade sira.#MediaIDN
|
|
