Díli- 16 Juñu 2025 , Alunu sira husi Kursu Estadu Maior Konjunta Integradu (CEMCI) ba dala 4 ,kontinua aprendizajen iha matéria Teknolojia Informasaun iha Segunda-feira ne’e. Ne’ebé hanorin husi Dr. Guilherme Soares, ho énfaze espesiál ba uza feramenta sientífika Google Akademia, atu ajuda alunu sira halo peskiza akademika.
Google Akademia mak plataforma sientífika ida ne’ebé importante tebes iha konteksu edukasaun atual. Liuhosi plataforma ne’e, alunu sira bele buka informasaun no referénsia sientífika ne’ebé fó sustenta ba traballu akademiku. Artigu sientífiku, jurnal no livru akademiku ne’ebé publika iha Google Akademia bele uza hanesan base ne’ebé konfiável atu halo argumentasaun sira ho evidensia konkreta.
Dr. Guilherme hateten katak uza referénsia sientífika mak dalan ida atu hadia kualidade traballu individual, tanba bele fó base forte no validu ba kada kontestu diskusaun. “Iha era digital ida ne’e”, informasaun iha Internet barak, maibé alunu sira tenki hetan kapasidade atu filtra no uza deit dadus sientífiku atu hala’o peskiza,” Dr. Guilherme dehan.
Uza feramenta hanesan Google Akademia bele fó kontribuisaun importante ba dezenvolvimentu kompeténsia peskiza no kapasidade kritika. Nune’e, alunu sira sei prepara di’ak liu atu responde ba dezafiu iha servisu akademiku no profisionál. #MédiaIDN
|
|
