Díli, 22 Agostu 2025 — Kordenador Kursu Ensinu Formasaun iha Institutu Defeza Nasionál (IDN), Superintendente Xefi António da Sá, akompaña Alunu Kursu Estadu Maior Konjunta Integradu ba dala 4 , iha vizita estudu ba Autoridade Protesaun Civil (APC) no Bombeirus, iha Kaikoli, Díli Kinta Feira ne’e .
Delegasaun kompostu husi alunu nain 14, ne’ebé mak 10 husi FALINTIL–Forsa Defeza Timor-Leste (F-FDTL) ho postu Ofisial Major no Kapitaun Tenente, no 4 husi Polísia Nasionál Timor-Leste (PNTL), ho postu Superintendente no Superintendente Asistente.
Vizita estudu ne’e iha objetivu atu aumenta no kompleta koñesimentu pratiku alunu sira, ne’ebé sai parte husi materiál kona-ba Autoridade Protesaun Civil, ne’ebé hanorin husi dosente Koronel Marco Paulo Cura Marques durante semana ida iha sala formasaun IDN.
Oportunidade vizita ne’e, Alunu sira haree direitamente kondisaun operasionál, preparasaun, estrutura no kapasidade APC no Bombeirus, hodi kompleta teoria ne’ebé sira aprende iha sala.
Iha vizita, delegasaun simu direitamente husi Sua Exelénsia Sekretáriu Estadu ba Autoridade Protesaun Civil Domingos Mariano Reis,. Akompaña komitiva sira ba sala operasaun, alunu sira haree sentru monitorizasaun ne’ebé funsiona 24 oras, atu fó atualizasaun permanénte kona-ba situasaun iha território Timor-Leste, hanesan rai-nakdoko no previsão tempu.
Parte final komitiva sira mós hala’o vizita estudu ba iha Bombeirus Kaikoli Díli , simu husi Komandante Operasaun, Sr. Cláudio da Silva. Hodi partilha informasaun kona-ba funsionamentu ekipamentu sira, kestaun tekniku, sistema kordenasaun vertikál no horizontál, no kapasidade resposta imediatu iha terrenu.
Vizita ida ne’e fó oportunidade boot ba alunu sira atu kompara no aprofunda koñesimentu teoriku no pratiku kona-ba rolu APC no Bombeirus iha konteksu seguransa nasional no resposta ba dezenvolvimentu dezastre natural. #MédiaIDN
|
|
