Díli, 14 Marsu 2025 – Diretór Interinu Institutu Defeza Nasionál (IDN), Kapitaun Fragata Duarte Borges Loe, Ph.D., hala’o enkontru ho estudante mestradu na’in 20 iha auditóriu IDN iha Palásiu Governu, Dili.
Objetivu prinsipál enkontru ne’e mak atu klarifika no diskuti formatu peskiza ne’ebé IDN distribui antes ba alunus sira ho intensaun atu fasilita prosesu peskiza estudante sira iha terenu. enkontru ne’e oportunidade atu IDN fó espilikasaun tan kona-ba dezenvolvimentu peskiza nian.
Durante diskusaun, estudante sira partilha dezenvolvimentu peskiza nian no dezafiu sira ne’ebé sira enfrenta iha terenu. IDN uza oportunidade ne’e atu fó klarifikasaun tan no orientasaun ne’ebé bele ajuda estudante sira prepara ho di’ak ba hasoru orientador.
Diretór Interinu Loe hatutan katak , IDN fó importánsia boot ba kualidade peskiza individual. Nune’e IDN kontinua fó susténsia ba estudante sira, inklui partilha aplikasaun Mendeley atu fasilita prosesu referénsia no organiza dokumentasaun sientífika.
Estudante mestradu sira ne’e, mak grupu dahuluk ne’ebé rejistu ba programa mestradu IDN no sei kontinua simu apoiu husi IDN iha, to’o remata peskiza ba kualidade. #MédiaIDN
|
|
