Díli, 1 Setembru 2025 – Funsionáriu sira husi Institutu Defeza Nasionál (IDN), hamutuk ho alunu sira husi Kursu Estadu Maior Konjunta Integradu ba dala 4, partisipa ho dignidade iha seremónia hasae Bandeira Nasionál, iha Segunda-feira, iha résidensia ofisiál Palásiu Governu, Díli.
Seremónia nune’e mós marka apertura semana dahuluk fulan Setembru, no serve hanesan parte integral husi preparativu ba selebrasaun loron relevente nasionál. Atividade importante ida ne’e hetan inspeksaun direktu husi Sua Exelénsia Primeiru-Ministru, Kay Rala Xanana Gusmão.
Partisipasaun IDN iha serimónia hasae bandeira iha inísiu fulan Setembru iha signifikadu boot iha konteksu nasional, no reprezenta komitmentu institutu nian ba valoriza símbolu soberania nasional. Hasae bandeira mak forma patriótiku atu demonstra loyalidade no respetu boot ba bandeira nasionál, hanesan simbolu unidade povu Timor-Leste.
Alunu sira husi IDN, hanesan lideransa foun ba futuru, aproveita momentu ida ne’e atu aprende, valoriza bandeira nasionál, respeita istória no sustenta identidade nasionál. Experiénsia ne’e bele aumenta sentidu nasionalizmu no kontribui ba unifikasaun entre instituisaun militár no sivil, ne’ebé importante tebes iha prosesu dezenvolvimentu nasionál.
IDN kontinua hadomi relasaun harmóniku ho estrutura governu sira, hanesan parte husi esforsu kolektivu atu bele sustenta stabilizasaun no dezenvolvimentu Timor-Leste. #MédiaIDN
|
|
