Díli, 30 Abril 2025 – Estudante sira husi Kursu Estadu Maior Konjunto Integradu (CEMCI), ba dala 4, hala’o ezame individual ba matéria Estudu Afrikanu iha loron ikus nian, ne’ebé hala’o iha auditorio IDN Palásiu Governu, Dili.
Atividade akademika ne’e hala’o no orienta husi dosente, M. Azancot dé Menezes, iha kontestu rezumu ba subtema sira kona ba Estudu Afrika. Hodi fó oportunidade ba estudante sira hatudu komprensaun no kapasidade reflektivu, analítiku no kritiku kona-ba istória, jeopolitika, ekonomia, kultura no situasaun sosiál iha kontinente Afrika.
Matéria ezame ne’e fó enfáze ba kontestu kolonializmu no deskolonializasaun Afrika ni’an, sistema polítiku no sosioekonómiku sira, no vizaun ba governasaun iha rejiaun sira. Parte importante tanba fó estudante sira perspectiva globál no sensibilidade ba diversidade, ho base iha diskusaun, leitura no observasaun real.
Estudante sira halo analize ba krize polítika no ezijénsia iha kontinente Afrika. Matéria Estudu Kazu kona-ba konflitu no rezolusaun sira iha Afrika, nune’e mós kontribuisaun Afrika iha asuntu globál no relasaun internasionál, inklui parseria estratéjika no implikasaun jeopolitika.
Ezame ne’e, parte husi atividade akademika ne’ebé la’ós de’it fó valór avaliasaun, maibé mós prepara estudante sira atu aplika aprendizajen ho autonomia no kritika.
Entretantu Estudante Kursu Estadu Maior Konjunta Integradu ba dala 4, hamutuk estudante na’in 14, mai husi superintendente asistente no superintende polísia husi PNTL hamutuk na’in 5. No Major, no Kapitaun Tenente husi F-FDTL hamutuk na’in 9, hahu matéria estudu Afrikaku, ne’ebé hanorin husi dosente M. Azancot dé Menezes durante semana rua, hahu loron 14 to’o 30 fulan ne’e. #MédiaIDN
|
|
